Молитвенник

Л. Господи, помилуй.

Заамвонная молитва

Св. Благословляяй благословящия Тя, Господи, и освящаяй на Тя уповающия, спаси люди Твоя и благослови достояние Твое; исполнение Церкве Твоея сохрани, освяти любящия благолепие дому Твоего: Ты тех воспрослави Божественною Твоею силою, и не остави нас, уповающих на Тя. Мир мирови Твоему даруй, церквам Твоим, священником, предержащим властем нашим и всем людем Твоим. Яко всякое даяние благо, и всяк дар совершен есть, сходяй от Тебе, Отца светов; и Тебе славу, и благодарение и поклонение воссылаем, Отцу и Сыну, и Святому Духу, ныне и присно, и во веки веков.

Л. Аминь. Буди имя Господне благословенно отныне и до века (трижды)[14 - На Пасху и во всю Пасхальную седмицу – вместо: «Буди имя Господне», поем: «Христос воскресе» (3 раза). То же и вместо 33 псалма.].

Священник и диакон входят в алтарь, и читается 33-ий псалом:

Благословлю Господа на всякое время, выну хвала Его во устех моих. О Господе похвалится душа моя: да услышат кротции и возвеселятся. Возвеличите Господа со мною, и вознесем имя Его вкупе. Взысках Господа, и услыша мя, и от всех скорбей моих избави мя. Приступите к Нему, и просветитеся, и лица ваша не постыдятся. Сей нищий воззва, и Господь услыша и, и от всех скорбей его спасе и. Ополчится ангел Господень окрест боящихся Его, и избавит их. Вкусите и видите, яко благ Господь; блажен муж, иже уповает нань. Бойтеся Господа вси святии Его, яко несть лишения боящимся Его. Богатии обнищаша и взалкаша: взыскающии же Господа не лишатся всякаго блага. Приидите чада, послушайте мене, страху Господню научу вас. Кто есть человек хотяй живот, любяй дни видети благи? Удержи язык твой от зла, и устне твои, еже не глаголати льсти. Уклонися от зла, и сотвори благо: взыщи мира, и пожени и. Очи Господни на праведныя, и уши Его в молитву их. Лице же Господне на творящия злая, еже потребит от земли память их. Воззваша праведнии, и Господь услыша их, и от всех скорбей их избави их. Близ Господь сокрушенных сердцем, и смиренныя духом спасет. Многи скорби праведным, и от всех их избавит я Господь. Хранит Господь вся кости их; ни едина от них сокрушится. Смерть грешников люта и ненавидящии праведнаго прегрешат. Избавит Господь души раб Своих, и не прегрешат вси уповающий на него.

Благословение и отпуст

Священник, обращаясь к народу: Благословение Господне на вас, Того благодатию и человеколюбием, всегда, ныне и присно и во веки веков.

Л. Аминь.

Св. Слава Тебе, Христе Боже, упование наше, слава Тебе[15 - На Пасху, во всю Пасхальную седмицу, и в отдание Пасхи – священник вместо: «Слава Тебе, Христе Боже» поет: «Христос воскресе из мертвых, смертию смерть поправ», лик же кончает: «и сущим во гробех живот даровав».].

До отдания же Пасхи после «Слава Тебе» иерея, лик поет: «Христос воскресе» (трижды).

Л. Слава Отцу и Сыну и Святому Духу, и ныне и присно и во веки веков, аминь. Господи, помилуй (трижды). Благослови.

Св. (Воскресый из мертвых) Христос истинный Бог наш, молитвами Пречистыя Своея Матере, святых славных и всехвальных Апостол, иже во святых отца нашего Иоанна, архиепископа Константина града, Златоустаго, (святых: храма и дня[16 - В отпустах дневных во всю седмицу, после упоминания Богородицы, есть еще особые на каждый день седмицы упоминания.На некоторые дни года и великие Владычные праздники положены особые отпусты.]), и всех святых, помилует и спасет нас, яко благ и человеколюбец.

Лик многолетствует церковные власти, правительство и всех христиан.

И священник, войдя во св. алтарь, снимает священныя одежды, читая «Ныне отпущаеши», Трисвятое, и по Отче наш – тропарь отпустительный, кондак, богородичен и благодарственные молитвы.

Молитвы ко святому причащению

Молитва св. Иоанна Златоуста

Господи Боже мой, вем, яко несмь достоин, ниже доволен, да под кров внидешп храма души моея, занеже весь пуст и палея есть, и не имаши во мне места достойна, еже главу подклонити; но якоже с высоты нас ради смирил еси Себе, смирися и ныне смирению моему, и якоже восприял еси в вертепе и в яслех бессловесных возлещи; сице восприими и в яслех бессловесныя моея души, и во оскверненное мое тело внити. И якоже не неудостоил еси внити и свечеряти со грешники в дому Симона прокаженнаго: тако изволи внити и в дом смиренныя моея души прокаженныя и грешныя. И якоже не отринул еси подобную мне блудницу, и грешную, пришедшую и прикоснувшуюся Тебе: сице умилосердися и о мне грешнем, приходящем и прикасающем Ти ся. И якоже не возгнушался еси скверных ея уст и нечистых, целующих Тя: ниже моих возгнушайся сквернших оныя уст и нечистших, ниже мерзких моих и нечистых устен, и сквернаго и нечистейшаго моего языка. Но да будет ми угль пресвятаго Твоего Тела и честныя Твоея Крове во освящение и просвещение, и здравие смиренней моей души и телу, во облегчение тяжестей многих моих согрешений, в соблюдение от всякаго диавольскаго действа, во отгнание и возбранение злаго моего и лукаваго обычая, во умерщвление страстей, в снабдение заповедей Твоих, в приложение Божественныя Твоея благодати, и Твоего царствия присвоение. Не бо яко презираяй прихожду к Тебе, Христе Боже, но яко дерзая на неизреченную Твою благость, и да не, на мнозе удаляяся общения Твоего, от мысленнаго волка звероуловлен буду. Темже молюся Тебе: яко един сый свят, Владыко, освяти мою душу и тело, ум и сердце, чревеса и утробу, и всего мя обнови, и вкорени страх Твой во удесех моих и освящение Твое неотъемлемо от мене сотвори; и буди ми помощник и заступник, окормляя в мире живот мой, сподобляя мя и одесную Тебе предстояния со святыми Твоими, молитвами и моленьми Пречистыя Твоея Матере, невещественных Твоих служителей и пречистых сил, и всех святых, от века Тебе благоугодивших. Аминь.

Молитва св. Василия Великого

Вем, Господи, яко недостойне причащаяйся Пречистаго Твоего Тела, и Честныя Твоея Крове, повинен есмь, и суд себе ям и пию, не рассуждая Тела и Крове Тебе, Христа и Бога моего, но на щедроты Твоя дерзая, прихожду к Тебе рекшему: ядый Мою Плоть, и пияй Мою Кровь во Мне пребывает и Аз в нем. Умилосердися убо Господи, и не обличи мя грешнаго, но сотвори со мною по милости Твоей: и да будут ми Святая сия во исцеление и очищение, и просвещение, и сохранение, и спасение, и во освящение души и тела, во отгнание всякаго мечтания, и лукаваго деяния, и действа диавольскаго, мысленне во удесех моих действуемаго; в дерзновение и любовь яже к Тебе, во исправление жития и утверждение, в возвращение добродетели и совершенства, во исполнение заповедей, в Духа Святаго общение, в напутие живота вечнаго, во ответ благоприятен на страшнем судищи Твоем: не в суд или во осуждение.

Молитва иная Златоустого

Несмь доволен, Владыко Господи, да внидеши под кров души моея; но понеже хощеши Ты, яко человеколюбец, жити во мне, дерзая приступаю; повелеваеши, да отверзу двери, яже Ты Един создал еси, и внидеши со человеколюбием, якоже еси; внидеши и просвещаеши помраченный мой помысл. Верую, яко сие сотвориши, не бо блудницу, со слезами пришедшую к Тебе, отгнал еси, ниже мытаря отвергл еси покаявшася; ниже разбойника, познавша Царство Твое, отгнал еси; ниже гонителя покаявшася оставил еси, еже бе; но от покаяния к Тебе пришедшия, вся в лице Твоих другов вчинил еси, Един сый благословенный всегда, ныне и в бесконечныя веки. Аминь.

Молитвы по святом причащении

Слава Тебе, Боже (трижды).

Благодарю Тя, Господи Боже мой, яко не отринул мя еси грешнаго, но общника мя быти святынь Твоих сподобил еси. Благодарю Тя, яко мене недостойнаго причаститися пречистых Твоих и небесных Даров сподобил еси. Но, Владыко Человеколюбче, нас ради умерый же и воскресый, и даровавый нам страшная сия и животворящая Таинства, во благодеяние и освящение душ и телес наших, даждь быти сим и мне во исцеление души же и тела, во отгнание всякаго сопротивнаго, в просвещение очию сердца моего, в мир душевных моих сил, в веру непостыдну, в любовь нелицемерну, во исполнение премудрости, в соблюдение заповедей Твоих, в приложение Божественныя Твоея благодати, и Твоего Царствия присвоение; да во святыни Твоей теми сохраняем, Твою благодать поминаю всегда, и не к тому себе живу, но Тебе, нашему Владыце и Благодетелю; и тако сего жития исшед о надежди живота вечнаго, в присносущный достигну покой, идеже празднующих глас непрестанный, и бесконечная сладость зрящих Твоего Лица доброту неизреченную. Ты бо еси истинное желание любящих Тя, Христе Боже наш и Тя поет вся тварь во веки. Аминь.

Молитва св. Василия Великого

Владыко Христе Боже, Царю веков и содетелю всех, благодарю Тя о всех, яже ми еси подал, благих, и о причащении пречистых и животворящих Твоих таинств. Молю убо Тя, блвже и человеколюбче: сохрани мя под кровом Твоим и в сени крилу Твоею, и даруй ми чистою совестию, даже до последняго моего издыхания, достойно причащатися святынь Твоих во оставление грехов и в жизнь вечную. Ты бо еси хлеб животный, источник святыни, податель благих: и Тебе славу воссылаем, со Отцем и Святым Духом, ныне и присно, и во веки веков. Аминь.

Молитва Метафраста

Давый пищу мне плоть Твою волею, огнь сый, и опаляяй недостойныя, да не опалиши мене, Содетелю мой; паче же пройди во уды моя, во вся составы, во утробу, в сердце. Попали терние всех моих прегрешений: душу очисти, освяти помышления; составы утверди с костьми вкупе; чувств просвети простую пятерицу; всего мя спригвозди страху Твоему. Присно покрый, соблюди же и сохрани мя от всякаго дела и слова душетленнаго. Очисти, и омый, и украси мя; удобри, вразуми и просвети мя. Покажи мя Твое селение единаго Духа, и не к тому селение греха; да яко Твоего дому, входом причащения, яко огня мене бежит всяк злодей, всяка страсть. Молитвенники Тебе приношу вся святыя, чиноначалия же бесплотных, предтечу Твоего, мудрыя апостолы, к сим же Твою нескверную чистую Матерь, ихже мольбы, благоутробне, приими, Христе мой, и сыном света соделай Твоего служителя. Ты бо един еси и освящение наших, блаже, душ и светлость, и Тебе лепоподобно, яко Богу и Владыце, славу вси воссылаем на всяк день.

Молитва иная

Тело Твое святое, Господи Иисусе Христе Боже наш, да будет ми в живот вечный, и Кровь Твоя честная во оставление грехов; буди же ми благодарение сие в радость, здравие и веселие. В страшное же и второе пришествие Твое сподоби мя грешнаго стати одесную славы Твоея, молитвами Пречистыя Твоея Матере и всех святых.

Молитва ко Пресв. Богородице

Пресвятая Владычице Богородице, свете помраченныя моея души, надеждо, покрове, прибежище, утешение, радование мое: благодарю Тя, яко сподобила мя еси недостойнаго, причастника быти пречистаго Тела и честныя Крове Сына Твоего. Но рождшая истинный свет, просвети моя умныя очи сердца. Яже Источник бессмертия рождшая, оживотвори мя умерщвленнаго грехом. Яже милостиваго Бога любоблагоутробная Мати, помилуй мя, и даждь ми умиление, и сокрушение в сердце моем, и смирение в мыслех моих, и воззвание в пленениих помышлений моих; и сподоби мя, до последняго издыхания, неосужденно приимати пречистых Таин освящение, во исцеление души же и тела; и подаждь ми слезы покаяния и исповедания, во еже пети и славити Тя во вся дни живота моего, яко благословенна и препрославленна еси во веки. Аминь.

Ныне отпущаеши… Святый Божt…(трижды). Слава и ныне… Пресвятая Троице… Господи, помилуй (трижды)… Слава и ныне… Отче наш…

Тропарь и кондак тому святому, чья совершалась литургия.

Тропарь, гл. 8: Св. Иоанну Златоусту.

Уст Твоих, якоже светлость огня, воссиявши благодать вселенную просвети. Не сребролюбия мирови сокровища сниска, высоту нам смиренномудрия показа; но Твоими словесы наказуя, отче Иоанне Златоусте, моли Слова Христа Бога, спастися душам нашим.

Кондак, гл. 6: От небес приял еси Божественную благодать и Твоима устнама вся учиши покланятися в Троице единому Богу, Иоанне Златоусте, всеблаженне, преподобие: достойно хвалим Тя, еси бо наставник, яко Божественная являяй.

Всенощное Бдение

Накануне праздников и воскресных дней совершается торжественная служба, называемая «всенощною». Всенощная состоит из вечерни и утрени следующего дня.

Вечерня

Священник, совершив каждение и став перед святым Престолом, начертает крест кадильницею, возглашая:

Св. Слава святей, и единосущней, и животворящей, и нераздельней Троице, всегда, ныне и присно и во веки веков.

Л. Аминь[17 - Если вечерня не соединяется с утренею, она начинается возгласом: «Благословен Бог наш» и в начале каждения не бывает.].

Св. Приидите, поклонимся цареви нашему Богу.

Приидите, поклонимся и припадем Христу, цареви нашему Богу.

Приидите, поклонимся и припадем самому Христу, цареви и Богу нашему.

Приидите, поклонимся и припадем Ему (и кадит всю церковь по обычаю).

Л. Благослови, душе моя, Господа. Благословен еси, Господи. Господи, Боже мой, возвеличился еси зело. Благословен еси, Господи. На горах станут воды. Дивна дела Твоя, Господи. Посреде гор пройдут воды. Дивна дела Твоя, Господи. Вся премудростию сотворил еси. Слава Ти, Господи, сотворившему вся. Аллилуиа, аллилуиа, аллилуиа. Слава Тебе, Боже.

Священник же в сие время перед св. вратами читает светильничные молитвы. Затем Великая Ектения.