Heather and Snow

'What for that, Kirsty?'

''Cause it wud shaw ye no a man yet! A man's a man 'at dis what's richt, what's pleasin to the verra hert o' richt. Ye'll please me best by no wantin to please me; and ye'll please God best by duin what he's putten intil yer hert as the richt thing, and the bonny thing, and the true thing, though ye suld dee i' the duin o' 't.—Tell me what ye're thinkin o' duin.'

'What but gaeing efter this new commission they hae promised me? There's aye a guid chance o' fechtin upo' the borders—the frontiers, as they ca' them!'

Kirsty sat silent. She had been thinking much of what Francis ought to do, and had changed her mind on the point since the time when she talked about him with sir Haco.

'Isna that what ye wud hae me du, Kirsty?' he said, when he found she continued silent. 'A body's no a fule for wantin guid advice!'

'No, that's true eneuch! What for wad ye want to gang fechtin?'

'To shaw the warl' I'm nane o' what my mither ca'd me.'

'And shawn that, hoo muckle the better man wud ye be for 't? Min' ye it's ae thing to be, and anither to shaw. Be ye maun; shaw ye needna.'

'I dinna ken; I micht be growin better a' the time!'

'And ye micht be growin waur.—What the better wud ony neebour be for ye gane fechtin? Wudna it be a' for yersel? Is there naething gien intil yer ban' to du—naething nearer hame nor that? Surely o' twa things, are near and are far, the near comes first!'

'I dinna ken. I thoucht ye wantit me to gang!'

'Ay, raither nor bide at hame duin naething; but michtna there be something better to du?'

'I dinna ken. I thoucht to please ye, Kirsty, but it seems naething wull!'

'Ay; that's whaur the mischief lies. Ye thoucht to please me!'

'I did think to please you, Kirsty! I thoucht, ance dune weel afore the warl as my father did, I micht hae the face to come hame to you, and say—"Kirsty, wull ye hae me?"'

'Aye the same auld Francie!' said Kirsty, with a deep sigh.

'Weel?'

'I tell ye, Francie, i' the name o' God, I'll never hae ye on nae sic terms!—Suppose I was to merry some-body whan ye was awa pruvin to yersel, and a' the lave 'at never misdoobted ye, 'at ye was a brave man—what wud ye du whan ye cam hame?'

'Naething o' mortal guid! Tak to the drink, maybe.'

'Ye tell me that! and ye think, wi' my een open to ken 'at ye say true, I wud merry ye?—a man like you! Eh, Francie, Francie! ye're no worth my takin' and ye're no like to be worth the takin o' ony honest wuman!—Can ye possibly imegine a wuman merryin a man 'at she kenned wud drive her to coontless petitions to be hauden ohn despisit him? Ye mak my hert unco sair, Francie! I hae dune my best wi' ye, and the en' o' 't is, 'at ye're no worth naething!'

'For the life o' me, Kirsty, I dinna ken what ye're drivin at, or what ye wud hae o' me! I canna but think ye're usin me as ye wudna like to be used yersel!'

''Deed I wud not like it gien I was o' your breed, Francie! Man, did ye never ance i' yer life think what ye hed to du—what was gien ye to du—what it was yer duty to du?'

'No sae aften, doobtless, as I oucht. But I'm ready to hear ye tell me my duty; I'm no past reasonin wi'!'

'Did ye never hear 'at ye're to lo'e yer neebour as yersel?'

'I'm duin that wi' a' my hert, Kirsty—and that ye ken as weel as I du mysel!'

'Ye mean me, Francie! And ye ca' that lo'in me, to wull me merry a man 'at 's no a man ava! But it's nae me 'at 's yer neebour, Francie!'

'Wha is my neebour, Kirsty?'

'The queston's been speirt afore—and answert.'

'And what's the answer til't?'

''At yer neebour's jist whaever lies neist ye i' need o' yer help. Gien ye read the tale o' the guid Sameritan wi' ony sort o' gumption, that's what ye'll read intil 't and noucht else. The man or wuman ye can help, ye hae to be neebour til.'

'I want to help you.'

'Ye canna help me. I'm in no need o' yer help. And the queston's no whar's the man I micht help, but whaur's the man I maun help. I wantit to be your neebour, but I cudna win at ye for the thieves; ye wad stick to them, and they wudna lat me du naething.'

'What thieves, i' the name o' common sense, Kirsty?'

'Love o' yer ain gait, and love o' makin a show, and want o' care for what's richt. Aih, Francie, I doobt something a heap waur 'll hae to come upo' ye! A' my labour's lost, and I dearly grudge it—no the labour, but the loss o' 't! I grudge that sair.'

'Kirsty, i' the name o' God, wha is my neebour?'

'Yer ain mither.'

'My ain mither!—her oot o' a' the warl'?—I never cam upo' spark o' rizzon intil her!'

'Michtna she be that are, oot o' a' the warl', ye never shawed spark o' rizzon til?'

'There's nae place in her for reason to gang til!'

'Ye never tried her wi' 't! Ye wud arguy wi' her mair nor plenty, but did ye ever shaw her rizzon i' yer behaviour?'

'Weel ye are turnin agen me—you 'at 's saved my life frae her! Diana I tell you hoo, whan I wan hame at last and gaed til her, for she was aye guid to me when I wasna weel, she fell oot upo' me like a verra deevil, ragin and ca'in me ill names, 'at I jist ran frae the hoose—and ye ken whaur ye faun' me! Gien it hadna been for you, I wud have been deid: I was waur nor deid a'ready! What w'y can I be neebour to her! It wud be naething but cat and dog atween's frae mornin to nicht!'

'Ae body canna be cat and dog baith! And the dog's as ill's the cat—whiles waur!'

'Ony dog wud yowl gien ye threw a kettle o' bilin watter ower him!'

'Did she that til ye?'

'She mintit at it. I ran frae her. She bed the toddy-kettle in her ban', and she splasht it in her ain face tryin to fling't at me.'

'Maybe she didna ken ye!'

'She kenned me weel eneuch. She ca'd me by my ain as weel 's ither names.'

'Ye're jist croonin my arguyment, Francie! Yer mither's jist perishin o' drink! She drinks and drinks, and, by what I hear, cares for noucht else. A' 's upo' the ro'd to ruin in her and aboot her. She hasna the brains noo, gien ever she bed them, to guide hersel. Is Satan to grip her 'cause ye winna be neebour til her and hand him aff o' her? I ken ye're a guid son sae far as lat her du as she likes and tak 'maist a' the siller, but that's what greases the exle o' the cairt the deevil's gotten her intil! I ken weel she hesna been muckle o' a mither til ye, but ye're her son whan a' 's said. And there can be naething ye're callt upon to du, sae lang as she's i' the grup o' the enemy, but rugg her oot o' 't. Gien ye dinna that, ye'll never be oot o' 's grup yersel. Ye come oot thegither, or ye bide thegither.'

Gordon sat speechless.

'It's impossible!' he said at length.