Дополнение к общему молитвослову

Владыко Господи Боже мой, Егоже в руках жребий мой, заступи мя по милости Твоей и не остави мя погибнути со беззаконии моими, ниже воли последовати похотствующия плоти на дух, создание Твое есмь, не презри дело руку Твоею, не отвратися, ущедри, но не уничижи: не презри мя, Господи, яко немощен есмь, яко к Тебе прибегох, покровителю моему Богу, исцели душу мою, яко согреших Тебе. Спаси мя ради милости Твоея, яко к Тебе привержен есмь от юности моея: да посрамятся ищущии отринути от Тебе деяньми нечистыми, помышленьми нелепыми, возмопинаньми неполезными. Отгони от мене всякую скверну, злобы излишество: яко Ты еси Един Свят, Един Крепкий, Един Безсмертный, во всех имеяй могущество безприкладное, и Тобою дается всем, яже на диавола и его воинства, крепость. Яко подобает Тебе всякая слава, честь и поклонение, Отцу и Сыну и Святому Духу, ныне и присно и во веки веков. Аминь.

Молитва 2-я, ко Пресвятой Богородице

Пресвятая Владычице моя Богородице, святыми Твоими и всесильными мольбами отжени от мене смиреннаго и окаяннаго раба Твоего уныние, забвение, неразумение, нерадение, и вся скверная, лукавая и хульная помышления от окаяннаго моего сердца и от помраченнаго ума моего; и погаси пламень страстей моих, яко нищ есмь и окаянен. И избави мя от многих и лютых воспоминаний и предприятий, и от всех действ злых свободи мя. Яко благословена еси от всех родов, и славится пречестное имя Твое во веки веков. Аминь.

Также: Честнейшую Херувим и славнейшую без сравнения Серафим, без истления Бога Слова рождшую, сущую Богородицу Тя величаем.

Господи, помилуй (трижды).

Господи, благослови.

Господи Иисусе Христе, Сыне Божий, молитв ради Пресвятыя Твоея Матери, преподобных и богоносных отец наших и всех Святых, помилуй нас. Аминь.

Молитва бываемая прежде еже уснути, и о искушающемся во сне

Многопетый Господи, нетленне, нескверне, едине безгрешне, очисти мя раба Твоего (сказать имя) от всякия скверны плоти и духа, и нескверна покажи благодатию Христа твоего: и освяти мя наитием Святаго Твоего Духа; да воспрянув от мглы нечистых мечтаний диавольских и всякаго искушения, сподоблюся во время благопотребно приступити и вкусити ужасных Твоих и страшных Таинств. Яко Ты еси благословляяй и освящаяй всяческая, Боже наш, и Тебе славу возсылаем, со Единородным Твоим Сыном и с Пресвятым Духом, ныне и присно и во веки веков. Аминь.

Молитва иная подобна

Боже сил, исцеляяй всяк недуг и всякую язю в людех, очисти рабы Твоя, и не даждь злому человеку и демону насильствующа: запрети нечистым духом, сокруши сатану под ноги рабов Твоих, обнови я Святым Твоим Духом, соедини я Святей Твоей Церкви, и всякаго действа противолежащаго избавивый, представи Святому Твоему жертвеннику, и небесных Твоих Животворящих Таин сподоби. Яко Ты еси Бог наш, Бог кающихся, и Тебе славу возсылаем, Отцу и Сыну и Святому Духу, ныне и присно и во веки веков. Аминь.