Помощь небесных покровителей. Полный сборник молитв на каждый день года (весна)

О преподобне отче и святче Божий Пахомие! Богови предстоя со Ангелы и преподобными лики, во святых твоих молитвах и нас грешных не забуди, но яко добрый пастырь и отец наш, молися о всех православных христианех, да подаст Господь Бог свыше победу и одоление на вся противныя враги наша и супостаты, и да устроит страну нашу в мире и тишине, и всякаго благоденствия да исполнит. Не забуди и нас, святче Божий, да соблюдет нас молитвами твоими Господь во временней жизни и грядущаго вечнаго жительства нас да сподобит о Христе Иисусе, Господе нашем, Емуже слава, честь и поклонение, со Отцем и Пресвятым Духом, ныне и присно и во веки веков. Аминь.

Тропарь преподобному Пахомию Нерехтскому, игумену Сыпанова монастыря, Костромскому чудотворцу, глас 4

Житейския молвы, преподобне, отвергся и, яко птищ, обрет в пустыни безмолвие, и в ней водворився, составил еси обитель Пресвятыя Троицы, в молитвах же и трудех прилежа Богови, процвел еси, яко финикс, быв образ утешения духовнаго; преподобне отче Пахомие, моли Пресвятую Троицу спастися душам нашим.

Ин тропарь, глас тойже

Житейския молвы, преподобне, отвергся и, яко птищ, обрете себе в пустыни безмолвие, в молитвах и бдении прилежа Богови, преподобне отче Пахомие, и остави древнее пребывание, и отыде в пустыню, и в ней водворися, и состави обитель во имя Пресвятыя Троицы, и процвел еси, аки финикс, и бысть образ утешения духовнаго. Темже, преподобне Пахомие, моли Пресвятую Троицу спастися душам нашим.

Кондак, глас тойже

В пустыни безмолвствуя, единствующу ти, Богоносе, взыскал еси Господа; Бога же, не оставлына тя единаго в пустыни, и Того повелением снидошася к тебе неколико братии, с нимиже ти молящуся Господеви, Троице пречестен храм воздвигл еси, в немже предстоя, преподобне Пахомие, молишися о спасении душ наших.

Величание

Ублажаем тя, преподобне отче Пахомие, и чтим святую память твою, наставниче монахов и собеседниче Ангелов.

Молитвы преподобному Серафиму Вырицкому

Молитва первая

из акафиста

О богоблаженный и премилосердый отче наш Серафиме! Ведуще тя и по смерти яко жива суща, с верою припадаем ти и вопием: не забуди убогих твоих до конца, но милостивно призри на стадо твое духовное и упаси е, добрый пастырю, благоприятными твоими к Богу молитвами. Испроси нам от Господа время на покаяние и греховныя жизни исправление, веси бо вся немощи наша душевныя: не имамы дел веры и спасения, не имамы ревности ко истинному богоугождению, пленихомся умом в погибельных страстех, растлехом сердца во гнусных похотех. Что убо чаем и на что надеемся, неключимии, разоривше храмины душ наших. Ей, святый отче, простри молитвенно руце твои ко Господу и умоли Спасителя рода человеческаго коснутися благодатию окамененных сердец наших, омыти нас слезами покаяния, возставити в вере, укрепити во благочестии и вся полезная ко спасению даровати. Не посрами упования нашего, еже по Бозе и Богородице на тя возлагаем, но буди нам скорый помощник, утешитель в скорбех и покровитель во обстоянии, да сподобимся молитвами твоими наследовати Царствие Небесное, идеже вси святии непрестанно славят и воспевают пречестное и великолепое имя Отца, и Сына, и Святаго Духа, ныне и присно и во веки веков. Аминь.

Молитва вторая

из акафиста с житием

О пречудный отче Серафиме, небесный жителю, Святаго Духа храме, Ангелом собеседниче, святым сожителю! Призри от небесных обителей, идеже ты ныне водворяешися, на нас, чтущих святую память твою. Се бо мы, яко сущаго с нами, молим тя, отче, не забуди чад твоих, имже обещался еси не оставити их. Виждь, отче Серафиме, яко от дел несть нам спасения, жизнь наша иждивается, и богатства инаго не имамы, разве скорбей, болезней и обстояний многовидных. Обаче и мы, поне и грешныя есмы, но Господа и Спаса нашего Иисуса Христа любим, и прощения грехов наших чаем. Темже припадаем тебе, и просим: молися за ны, отче Серафиме, яко дерзновение имея к Небесному Царю. Помяни нас, помощи твоея требующих, и умоли Господа Славы грехов прощение нам даровати, в житии сем нас укрепити, делателей заповедей Божиих сотворити, спасение улучити и внити, аможе ничто нечистое не входит – в Царствие Небесное, идеже ты со всеми святыми в незаходимей славе воспеваеши Отца и Сына и Святаго Духа, Троицу Единосущную и Нераздельную, царствующую во век века. Аминь.

Тропарь преподобному Серафиму Вырицкому, глас 4

Яко пресветлая звезда Российския земли, возсиял еси в веси Вырицстей, преподобне Серафиме, и, силою Святаго Духа наставляем, светом чудес твоих страну нашу озарил еси духовно. Темже и мы, притекающе ко гробу твоему, умильно глаголем: моли Христа Бога спастися душам нашим.

Кондак, глас 5

Уподобился еси древним отцем и подвигом добрым подвизался еси, благодатию Христовою просветився, от Негоже прием дарования чудес, недугующих исцеляти, печальных и скорбящих утешати, обидимых и гонимых защищати и всем в нуждах сущим отраду и скорое избавление подавати. Сего ради, яко великаго чудотворца чтуще, молим тя, чада твоя, преподобне Серафиме, от всех бед избави нас молитвами твоими.

Ин тропарь, глас 4

Яко великаго молитвенника за землю нашу и утешителя теплаго притекающих к тебе, ублажаем тя, вторый русский отче Серафиме, вся бо яже в мире красная оставил еси, всем сердцем устремился еси к чертогам сладчайшаго Христа и в годину лютых гонений образ кротости и смирения всем был еси: не престай и ныне молитися за ны, да в терпении обрящем путь покаяния и с тобою выну славим Пресвятую Троицу.

Ин кондак, глас 5

Подражая богоносному угоднику Саровскому, Духа Святаго благодать обильно стяжал еси: Александро-Невския лавры крине благоуханный, Вырицкия веси похвало, сего ради и мы тебе зовем: радуйся, преподобне Серафиме, милостивый наш предстателю пред Господем.

Величание

Ублажаем тя, преподобне отче Серафиме, и чтим святую память твою, наставниче монахов и собеседниче Ангелов.

22 марта/4 апреля

Праведного Василия, мученика и страстотерпца, Мангазейского чудотворца (1602).

Преподобного Исаакия исповедника, игумена обители Далматской (383).

Воспоминание знамения, явлъшегося от иконы Пресвятой Владычицы нашей Богородицы и Приснодевы Марии во граде Изборске (1634).

Молитва праведному Василию, мученику и страстотерпцу, Мангазейскому чудотворцу

из службы

Святый мучениче Христов Василие, радости святых единовсельниче, наших скорбей и печалей пременителю и всякаго зла демонскаго губителю, припадая, молю ти ся: прииди в заступление мое, яко да очистится ум мой от деяния греховнаго, понеже лишаюся за сие благодати Божия; не имею тверда основания к покаянию, даждь ми умиление душевное и слезы грехоомывательныя, воздежи руце твоя святыя за убогую мою душу ко Господу Иисусу Христу, не остави мене, грешнаго, ради моего невоздержания, укрепи мя, бедствующаго душевными помыслы и внешними обуревании, имиже сам себе вина бываю, или от ненавидящих мя вправду, но вся по грехом моим праведно исповедаю. Буди ми, малодушному, покровитель и поборник благ и милостив, присещай мя, грешнаго, в скорбех и печалех и сохраняй от всякаго смущения противнаго, да не когда прогневаю Бога моего и тебе, смолебника моего благаго, но утверди мя молитвами твоими в страсе Божии и достойна покажи своея всегда милости. Аминь.

Тропарь праведному Василию, мученику и страстотерпцу, Мангазейскому чудотворцу, глас 8

Богатство видев чистыя души твоея, Василие, украсти тщашеся праведных враг, подусти господина твоего, иже покраденнаго ради богатства своего предав тя судии, и от того неповинне многия претерпел еси муки, непобедим пребыв до смерти. Тем, яко приемый венец страдания от всех Владыки, моли всем от напастей свободным быти, чтущим любовию святую память твою.

Ин тропарь, глас тойже

Яко пресветлое солнце, возсиял еси чудесы своими в Сибирстей стране, в Мангазейских пределах, новый мучениче неповинный страдальче, святе Василие! За чистоту душевную и телесную пострадал еси от лютаго врага распалением и немилосердием господина своего и от начальствующаго бо ту градскаго неправеднаго судии, и муки неповинно претерпел еси, и кровь свою святую пролиял еси, желая вечнаго Царствия Небеснаго. Сего ради Христос Бог венча тя мученическими венцы на Небеси, и на земли прослави, и Своим Божиим промыслом повеле земли самой от недр своих гроб, и тело твое, и срачицу, обагренную кровию твоею, израсти нетленно. И ныне притекающим к тебе с верою и везде призывающим святое имя твое, полезная вся, и грехов оставление, и телесем здравие подавай, чтущим верою святую память твою, и моли Христа Бога спастися душам нашим.

Ин тропарь, глас тойже

От града Ярославля Божиим смотрением в страну Сибирскую пришедшаго и за целомудрие от господина своего в Мангазеи пострадавшаго, блаженнаго Василия почтим, егоже Христос Бог мученическим венцем венча на Небеси, нетлением и чудесы прослави на земли. Ты же, честный страдальче, предстательством своим страну нашу в мире сохрани и молися о спасении душ наших.

Кондак, глас 4

Страдание совершив, святе, погребения же честнаго не сподобився, в тинное место ввержен и попираемь был еси от мимоходящих, но Бог прослави мощи твоя чудесным явлением, Василие, прославляяйся во святых Своих, даяй страдальцем венец нетленный.

Ин кондак, глас тойже

Иже новый в мученицех неповинный страдальче, святе Василие, преревновал еси Иосифу Прекрасному и Моисею Угрину во искушениих, за чистоту душевную и телесную муки неповинно претерпел еси. Сих ради прослави тя Бог, и святыя твоя мощи, по явлению твоему, от Мангазеи к Енисею во обитель Святыя Троицы ту сущим настоятелем принесошася и подают исцеления с верою приходящим и везде призывающим святое имя твое. Страстотерпче святый, моли Христа Бога о православном народе нашем и о всех воех наших, победу и одоление нам на всех непросвещенных иноязычных людех даровати, способствуя, и от междоусобныя брани спастися всем моли.

Ин кондак, глас тойже

Просветився Божественною благодатию, Боголюбче, целомудрием и терпением течение свое мученически скончал еси, темже и по смерти яви тя светлость жития твоего, источаеши бо чудесы, с верою приходящим к честному гробу твоему и вопиющим: радуйся, святый Василие, Мангазейский и всея Сибири чудотворче.

Величание

Величаем тя, святый праведный Василие, и чтим святую память твою, ты бо молиши за нас Христа Бога нашего.

Молитва преподобному Исаакию исповеднику, игумену обители Далматской

из книги молебных пений

Православия ревнителю и ереси обличителю, Церкве поборниче и иноков похвало, преподобне отче наш Исаакие! К тебе во умилении сердец наших притекаем и твоея помощи ко спасению нашему просим. Ты бо пророку Божию Илии поревновал еси и царя злочестиваго небоязненно обличил еси: ты к познанию веры Православныя того увещевал еси и от него поругания и злострадания радуяся претерпел еси. Вразуми убо и нас молитвами твоими евангельское благовестие неизменно соблюдати и всякой ереси противостояти, искушением же от многострастныя плоти нашея, от мира сего и от диавола бывающим противитися. Научи нас во храмех Божиих неленостно собиратися и по вся дни покаяние Господеви приносити. Веруем и уповаем, угодниче Божий, яко не вотще благолепнейшая во стране Российстей церковь в царствующем граде нашем волею Божиею во твое имя создася, но да вси православнии, от всея страны нашея во храм сей притекающии, на подвиг твой взирающе, вере твоей подражают. Испроси убо, преподобне отче Исаакие, правителю нашему здравие и спасение, пастырем Церкви о спасении верных ревность, всем же православным христианом в вере единомыслие и в любви преспеяние, усопшим же блаженное упокоение, да сия вся молитвами твоими восприемлюще, купно с тобою прославим Бога, дивнаго во святых Своих, в Троице славимаго, Отца и Сына и Святаго духа, ныне и присно и во веки веков. Аминь.