Арсеман, монь арсеман…

Ульнесь кизэнь маней валске. Пичеледе авасоло пандо алга чудиця леенть велькска-чирева, зярс эзь кенере келейстэ варштамо чись, удомаст явавтнесть сувонь кельме пельть. Пиресэ эмежтне ды умартне лембе, састо ды кувать молиця пиземеденть ургатетсть касомо – виень-потьмежачинь таштамо. Сынь кецнесть ды эсь пачкаст кучнесть сюкпря летькень кучиця менелентень, лембень раштыцянтень.

– Кодамо коштось ванькс! Лексят лексевлить. Течи вальсемат модамартне, шкаст, чинь-колмонь ютазь потмозост а совават, – ледстизе Натуш, удомадо мейле кургонь автнезь, ансяк кавонест Теряй марто лиссть кудосто ды валгсть кузтемпес. Аванть лангсо каркске марто валдо-пиже човине коцтонь вень кувака паля. Секс валскень экшеденть эзь аштеве, мерсь мезе-бути эстензэ марямга ды юрк совась, теке чеерь варязонзо, кудос.

Теряй кундась тевс. Васняяк тонгсь резинань кемть. Совась панжадо кенкш латалов, сайсь модашка. Келейстэ эскелязь ютась вальмало путовкс «умантень» ды кундась мерезенть топавтомо – вальсеме. Кирда, модакикс, мельганзо омбоце, колмоце… Тевесь мольсь. Зярдо тесэнь путовкс «паксясь» прядовома маласоль, састыне сась теке удомань оршавкссонть Натуш.

– Те зярс эзик прядо?! А-я-яй… Лыкама седе, лыкама… Мон арсинь… Капшак. Пиземе илязо туе. Мейле а соват. Вот так вот! Несак, зярошкат кассть? …Ярсамо адя, – паро ёжосо черькстась прясонзо, кончтась ды прядынзе кармавтоманзо. Теряень апак учо велявтсь ды сыргась, пиже янганть нурькинестэ эскелязь, кудов. Молемстэ кайсесь превсэнзэ, кодат тевть теема течи васняяк, мезе тантейне, седеень витиця путома стуворс чикуншканень. «Тевтне – тевть, а пекесь соды эсензэ!» – марямга прасть кургстонзо валтнэ, сонськак эзизе редя.

– Прядса икельксэм, сован! – серьгедсь мельганзо Теряй, колызе валскень гайгиця экше каштонть, ды поладызе барцаеманзо, мель путсь седе парсте вальсемс модамарень эрьва куракшкенть. Коштось экше. Тень лангс апак вано, кутьмерезэ ялатеке начксь панартомояк.

Эзть юта вете минутаткак, таго вайгель, ней кудоужосто, веёндо:

– Кежень илить савтне! Кеменьксть эждеме а карман! – серьгедсь ярсамонь анокстыцясь ды выр-вар тусь эрямо пизэзэнзэ.

Мельганзо, кадызе тарказонзо, модакиксэнтень, модашканзо, сыргась, стакасто эскелязь, вальсицяськак. Кузтемпесэ каинзе пильгстэнзэ рудазов карсемканзо, оршизе панаронзо.

Ансяк панжизе кудокенкшенть, стуворонть вакссо стядо котьмиця низэ варштась совицянть лангс, ледстизе:

– Кедеть шлить? Аволь, аволь тесэ – ушосо. Вант, иля пургсе, таго монень сави мельгат нардтнемс. Кедеть нардтнить палманентень эскс понгавтозь нуласонть.

Те «инструкциядонть» мейле Теряйнень савсь лисемс ушов. «Фу, допрок стувтыя теемс тень сеске!» – ютась пряванзо, янксезевсь. Сон шлинзе-нардынзе кедензэ, топавтызе кармавтозенть ды апак эрязкале совась кудос.

– Озак! – нулновтсь прясонзо ды невтсь сурсонзо озамкаенть ёнов азоравась. – Каян сывельям. Печксек кши. Аволь, аволь те пеельсэнть! Оно сеньсэ. Човинестэ бажак! Конёвнеть мекс эзить сравтне? Теньгак теть ёвтама…

Теряй керсесь кши, таргась стуворпотсто пенчть, кандсь тона кудосто нинстэнь эземне. Окойники озасть стувор экшс.

– Мекс конёвнетнень пест эзить мендя? Паморькстнэ киякссо улить! Каня, а чарькодеви, каня эзинь мерне? Кинь учат? Пенченть, пенченть мекс аволь сень саик?! Ваканот седе малав шаштык! – прок эрямо парьстэ валозь валовсть Натушонь кургсто кармавтоматне ды превспутоматне, эйстэст, секень вант, тармазкадат. Кода кирдсь сынст атясь, а чарькодеви.

Теряй чатьмонсь. Сон содась, пе те «уроконтень» карми а курок. Пенчезэ ды пейсалазкензэ содасть эсест, чевелясть – пештясть пеке. «Уроконть» кувакачидензэ теке ведьс вансь.

– Вант, паморькст иля правто масторов, комак ваканонть вельксэс! Текень содан, эрьва чистэ мельгат ветексть тенсян, вот так вот, – ярсамстояк эзь чатьмоне, превть макссь, яла тонавтсь, кармавтсь стуворонь прявтось. – Саик, саик турваужостот педязь кувиненть.., во-во, текень учинь, – кедькоморсонзо… Ну кие, кие истя тейни? Каня а чарькодеви – сурсо саема, сур песэ! – тень мерезь, венстизе вить кедензэ ды невтизе кода эряви – невтий сурсонзо нардызе педявкскенть турвастонзо.

Стуворонь азоронть моронзо кунсолозь, Теряй сэвизе сывель марто модамарьям ваканонть, симизе кечине кофензэ, ёвтась сюкпря ды чатьмонезь лиссь ушодозь тевензэ прядомо.

Вальмало «уманзо» прядомадо мейле ютась умарьпиресэ путозтнень вальсеме. Сынь озавтозь байтяк шкань ютазь. Вишкинеть. Шкасткак эзь са. Эйстэст ветешкатнень пирень прявтось нерьгстынзе човор газононь тикше марто. Эль-эль неявить. Вейкень Теряй эзизе редя, цёх керизе, керявозь модамарень нетькскетне вельтявсть модасо.

Тень Теряень вакска яннэванть састо молемстэ неизе азоравась. Неезденть Натушонь ёжопонанзояк стясть, пачканзо кивчк ютась псинь нал, соракадсь, теке маштыкс куродызе. Сельмесэнзэ кивчкадсть-чийнезевсть кежень сяткот. Сон вачо вадовокс каявсь каршонзо стядо, модашканзо лангс нежедезь аштиця лов ашо пря атянть лангс. Аноколь раздемс.

– Каня а неят, мезе теят, каня сельметь таргизь?! – кежтнеде сорнозь, пирень келес пижнезь, автордызе атянть кедьстэ модашканть ды весе вийсэнзэ, теке превстэ лиссь, вередемсь невтемань кис яхоеме-вальсеме. Цят шка – илыкезэ маштсь. Варсодизе псинзэ пачк модашканть Теряень пильгензэ ваксс ды поладызе тонавтоманзо ней уш кельсэ: – Кодамояк тев теть а тееви, мезекскак а маштоват, чаво ломань, ничего тебе не надо!… – пижнезь-сялдозь, Наталь «човсесь» мирдензэ. Прядомакс цюх сельгсь ды велявтсь, полавтызе мелензэ, мекев, кудоёнов.

Теряйнень эряволь сеске туемс аксунгалицянть икельде: а мезть кунсоломс кежсэ пургсиця ломаненть, сонзэ ормаза моронзо. Сон сынст содасынзе. Тейсь ильведькс – эзь туе. Марязденть-неезденть гувк тапардызе пси, эрязкалезевсь седеезэ. «Мезень кис, мезень кис?» – теке кевкстнесь сон . Прязо налкставиця мельтнеде увнось. Эзь сода, мезе теемс, ков молемс. Варштась икелензэ усксевиця модашканть лангс ды прянь нолдазь, састо эскелязь сыргась пирекуншкава янганть вирь ёнов. Сон ушодови Черькаень Наталень уличинзэ-моданзо пестэ сеске.

Торох, дух а мезень кис лангозонзо каявомась, маней менельксэнь келес пижнемась, прясто кочкаряс покордамось эзть максо прянтень арсемс мездеяк лиядо. Лепштясь…

«А! Полавтомс эрямонь мазычинть, эрьвела, ванькс ёжотнень модамарень эль лексиця нетькске лангс! Кодамо авечкема ды нарьгамо оймень ваньксчи лангсо! Кодаяк а чулгови, мекс истя? – лакасть, чавсть авидечиденть валтнэ-мельтне, кевкстематне Теряень прясо. – Кинень пшкадемс, мезе теемс?

Вирь, вирь, мекс чатьмонят? Мекс тынь, кувака рунго пичеть, вал а каятадо кисэнь? Каня а марясынк мештестэ лисиця кувсеман? Ёвтынк меленк, кода тень улемс? Саема, паряк, латалксонь стенас понгавтозь пиксэнть ды… Мезе лия кадовсь? Паряк, ёвтатадо мель, кода лисемс кажостонть? Те кодамо эрямо? Ужо-ужо… А кие сестэ, арсек, тевень топавтсынзе? Ушодозь эйстэст аволь аламо. Аволь, малавгак аволь ансяк пандянь-кардазъютконь! Лиянень сынь а теевить, монень, лексек-пувсек, ускомат. Секскак тоначив туемадо мельтнень – шукшпряв. Те истя. А кода улемс вейсэнь эрямонть марто? Кода? Муемс лия эрямо тарка? Муинь… Эрямс ськамот? Теяк… Аволь макшов мукорян. Чангодть, Инешкипаз!»

Модамарень керязь нетькскеденть таргонь перть Черькаень кудосо кирдевсь кельме кошт, коня алга варштавкст, пеень пачк ёвтазь кавто валт: «уле» ды «арась».

«Кирдемс мештесэть зняро кежть, сэредстиця, навола ризкс ёжот… – арсесь Теряй Натушонь пукштяиця, ордакш обуцядо. – Инешкипаз, каня тень туртов чачозтяно? Мезень кис аванок зняро майсесть ды мелявтсть мартонок? Лиси, сакшнотано тей вейкень кис: майсевеме.

Туемс? Ков, косо ды ки монь, сыре каргонть, учи? Косо кемемась, колмоце муевксэсь карми седе мариця ойме, валдосо гувкаиця? Илязо лисе седеяк пшти», – яла онкстнесь, яла кайсесь эськанзо Теряй, ды кода-бути ледсь мелезэнзэ умоктояк умок, тона нинть марто эрямсто, ловнозь Лев Толстоень «Крейцерова соната» келей ёвтнемазо. Эйсэнзэ невтеви семиясо эрямонть алкуксонь «мазычизэ», сонзэ «танстезэ». Сон истямо ды невтезь истя – удомазо цёранть сезневкшнесь аволь ве таргонь перть. Эйсэнзэ тешкстави: вейксэньгемень вейксэ процентт семиятне-кудораськетне – эрить сёвнозь-тюрезь, мельга-мельцек салава ваннозь, микшнезь, полавтнезь. Стака ульнесь марямс истят валт ине философонть пельде.

Ды аволь ансяк Лев Николаевич! Лия сёрмадейтнеяк ёвтнесть ды ёвтнить кудораськеденть аволь цяпамонь валт-мельть: «зона», «колония», «палач»; ававттонть – «мучказ» («надзиратель»), «полон». Астяко тюрьмань валт-лемть педявтнесть! Ды… педявтнить.

Секс Теряй вельть эзь правто туемс Натушто, те кежсэ-ацирьгалемасо цилькаиця эрямо таркастонть. Кирдсь кор. Кирдсь пеень сускозь, кирдсь кода маштсь…

«Тук, варчик! Семань Итёк оно сисемксть кайсесь кирьгазонзо ашко, совсесь содамокс. Сисемексть! Ундоксткак – тейтернеть-цёрынеть – кенерькшнесь зярыя таркава нолдамо. Кадык эно цёрась улевель нузякс кандо эли кодамояк меельце симагай. Покш, виев, мазый, тевсэ – сырнень кедь. Вейкесь «нитнеде» санонзо таргась, омбоцесь, колмоцесь… Сисемецесь истя карсизе – сельгсь ды ношкстась эйстэнзэ мейсэ авазо чачтызе. Оргодсь вень куншкат, ков сельмензэ несть».

Кежей Наталь, сезеви эрьва штелькстэ, акирдевиця кор, сень кис винапетнявкс а каи, валонзо лангсо – азор. Мезе мери – топавтсы! Уски-важоди лишмекс, сивекскак а эряви. Кудоютконь тевтнесэ – дёрдо дёр! Секскак Теряй атя лия ёнга ливтнемадо арсематнень малавгак эзинзе нолдтне.

Мезесь кедьсэть уле – уле, а редяви, ёми – чарькодьсак, кодамо питнейчи, мезе ёмавтыть. Лиясто мик ёмавтыцянть летькемить сельмензэяк, нолдасынзе кедензэ. Секс…

Ёгань Теряй тунь эзь чумондо Натушонь, тунь. Каня аламо цёрат-ават, одт-сыреть майсевить панжома экшсэ чумочинь кис, конань эзизь тее? Чумонь теицятне, васняяк, – тетяст-аваст. Сынь, теде малавгак апак арсе, апак сода ды апак редя, «казить» эйкакшост туртов берянь кор, анокстыть-стявтыть нолажа киланга эскелицят, тюрьмава аштицят. Истя лиссь Натушонь аванзо мартояк. Сон а чумо, лиссь истя – кастызе кемнилее иень перть пакшанзо колмо цёрадо мейле вейкине кольнягай тейтернекс ды казизе тензэ ордакшонь-аксунонь «орманть». Шкань-шкань Натуш марявсь атянтень натой жаль.

…Аволь уш истя сеедьстэ ёндолтнэ кивчкаесть ды сезнесть Пичеле велькссэ новолезь пиземень чопода тандавтниця пельтнень. Ульнесть седеень кецневтиця, маней, мизолдыця читькак. Кодамокс илязо уле менелесь, эрямось ве таркасо эзь аште.

Чинь тевтненень путозь пе. Теряй атя озадо аштесь кузтемпесэ. Оймсесь. Икельганзо, пирепеваст, ожо меште пичетне чатьмонезь учость чокшненть самонзо. Вановт кецневтсть пиресэст пиже ябунцясо копачазь умарьчувттнэ. Кодат тустот ды рукшнат лопаст! Сэнь масторонть азорозо кенерсь валгомо оймсеме. Конизе сельмензэ ды кекшсь пичетнень томбалев. Виренть велькска менелесь артовсь палозь палыця ожо-якстерестэ.

Сась, кода свал апак учо, прязонзо ледстнема вейке ковол шкастонть, зярдо паротнеде, маней читнеде потмуратнень коряс, Натуш марто вейсэнь эрямосост седе ламольть. Одольть…

Зярдояк а стувтови Домка эрькев экшелямо якамост. Эйзэнзэ велестэнть вайгельпешка. Ансяк ютамс сынст келей лаймеванть ашождыне. Теине, тей-тов менчевиця яннэсь ветясь тов куракш, карксамга сэрей тикше юткова, начко-рудазов таркава. Видестэ лемдекшнизь умонь эрицятне – Домка. Алкукс истя. Текеде, паряк, истямо ванькс ведезэ – сельведь. Эйсэнзэ кирьгава аштезь шождасто неявить-лововить пильгесурот. Перьканзо касыть, мазылгавтыть эрькенть ды тесэнь ёнкстнэнь, калень, эрьбань, ламарень, чевгень ды лия эрьва кодат куракшт.

…Шказоль чикуншкадо мейлень. А куш а каш. Оймсесть чувтнэнь потсо нармунтне. Псиденть чатьмонсть, эзь маряво тикшенть потсто тастынетнень кайгасо налксемасткак.

Эрькечирентень аламнеде апак пачкоде, васенцекс, тунь апак визде, кайсесь, мезеяк эзь кадо лангозонзо, Натуш. Киде виздемс? Оршамонзо, венстизе кедензэ, понгавтынзе рацяня пешкс куронь нурьгиця тарадпес. Састыне, ёжонь марязь, ожо пси чуваронть ланга ютась, икелев ванозь, веденть малас.

Теряй понксонзо-панаронзо каямо эзь эрязкале. Стядо аштесь нидензэ авасоло ды вансь сонзэ аволь сэрей, аволь эчке, теке тейтерень, рунгонзо лангс. Вансь сельмень апак кончтне, сэвезь сэвсь вановтсонзо. Некшнизе нинзэ эрьва кода, эрьва косо ды, содави, аволь весть, а вана истя, пижесэ пирязь эрькечирева, ожо чуварнэ ланга эскелицякс, эрьвела ёжосо, прясто пильгс штапокс, – васенцеде.

Зярс-бути Натуш аштесь стядо, вансь чипайденть цитниця эрькенть чамас, аламо шкань ютазь вановтсонзо ютась куракшов, пиже кундокс неявиця, чиреванзо. Ландясь ды састыне нолдызе вить кедькоморонзо ведентень. Икельганзо тей-тов укшность вежаськедеяк вишкине сияждыця калнэть, сэперькеть. Кечинекс кедькелензэ теезь, амольдясь ведь ды пургизе-начтызе мештензэ. Стямсто потензэ ланга чипаенть визьксэнь асодыця вановтто нолаштсть, теке сиянь эрьгинеть, цитниця ведьбайгинеть. «У-у-у, кодамо экшине!» – рунгонзо витемстэ таргизе «у-у-у»-ть сорныця вайгельсэ. Ялатеке тандавтниця кельмекс эзь маряво. Кедензэ кавто ёнов келемтезь, прок нармунь сёлмонзо, экшентень апак тонадо, сурневксэнь марязь, састо-састо совась ведентень – васня кумажава, мельганзо карксамга, седе верьга.

«Вай, вы-ый, кодамо кельме! – цирнезь серьгедсь пертьпельксэнть келес, сонсь варштась удалов, эйстэнзэ авасоло палманькс аштиця поланзо лангс.

– Мезть сельметь полгарьгавтнят? Эли эзимик некшне? Кайсек ды бырсэ ваксозон! Иля пеле, а сусктан!.. – серьгедсь Натуш пеедькшнезь ды болдор-болдор тусь «пинекс» уезь. Пильгсэнзэ ботамодонть кувтань-кувтань кепсевсть ведьбайгень сырнень сяткот. Тейсь кирькс, мельганзо омбоце…

Теряй кайсесь ды учось, зярдо Натуш лиси ведьстэнть ды одс невтьсы чипаень валдосо артозь авань мазычинзэ.

Умок те ульнесь, вельть умок! Вейсэнь эрямостост васенце эли омбоце иестэнть. Ды теке исяк! Ваясть сынь домкадояк домка шкань отьмантень. А велявтсыть. Паро теяк – кадовсть кизэнь се пси чиденть, се экшелямодонть, сеть уцяскадо пешксе минутатнеде, теке пиже-мазый панжиковдо, валдо ледстнемат.

Азгондят, теке лытагай!

…Валскесь ушодовсь кода свал. Эль кенерсь менелень валдось састыне-састыне совамо вальматнева ды пештямо аксялкстнэнь, Теряй штавтызе лангстонзо кизэнь шождыне вельксэнть, чалгась кияксос ды ютась удалце кудонь вальманть икелев: мезе моли менельсэнть? Мезе полавтовсь? Тень топавтозь, ёрвалдызе шлямкайсэнть чаманзо, нардынзе кедензэ. Оршнесь ды лиссь, панжизе кудокенкшенть, кудыкелев. Саинзе чаво ведратнень ды мартост калдор-кулдор валгсь кузтемпес.

– Шумбрат, маней валске, шумбрат, якстере вановт чилисема! – паро ёжосо, марямга мерсь Теряй атя, мизолдыця чилисеманть якстере сёлмонзо лангс ванозь. Валтнэнь ёвтазь, сыргась пиренть трокс «викториянь» пандятнень юткова яннэванть лисьмалангов.

Таргась ведра ды жойсэ каизе эсензэ ведрас, амольдясь омбоце. Кандтнинзе-совавтнинзе кудыкелев ды кудос ведте пешксе ведратнень. Банянь уштомс кандсь кавто керьметь эчке, беряньстэ лазнозь пенгть, нардынзе голландкасто куловтнень, пештинзе ведте банянь ачеменииця покш кедьгенть. Эзь стувто, варштась кардазовгак – нолдынзе пиринестэст ды очкозост каясь товсюро саразтнэнень.

«Фу, окойники!» – мерсь эськанзо, валскень тевензэ прядозь, атясь. Сон арсекшнесь аламошкас новолемс кузтемпесэ тонадовозь эземнентень. Эзь кенере. Панжовсь пижесэ артозь кудыкельксэнь кенкшесь, ды кенкшалксонть лангс стясь Натуш.