Помощь небесных покровителей. Полный сборник молитв на каждый день года (осень)

Смиренномудрия исповедниче предивный и человеколюбия Духом Святым согреваемая доброто, Богу возлюбленне Силуане, о подвизе твоем Церковь Российская радуется, иноцы же горы Афонския и вси христианстии людие, веселящеся, сыновнею любовию к Богу устремляются. Егоже моли о нас, равноангельне боговедче, во еже спастися нам, в горении любве тебе подражающим.

Ин кондак, глас 6

О предивный угодниче Божий Силуане, земли Российския благодатное рождение, пустыннолюбцев горы Афонския похвало и украшение! Приими от нас малое сие моление и испроси у распеншагося за мир Христа Бога нашего, да помилует всех нас, чад Своих, и благодатию Святаго Духа в союз любве Своея свяжет нас, и имиже весть судьбами к Себе приведет, во еже твоими молитвами непостыдно явитися нам в день судный пред лицем славы Его, и сподобитися со всеми святыми и ангелы воспевати победную песнь: Аллилуиа.

Величание

Ублажаем тя, преподобне отче Силуане, и чтим святую память твою, наставниче монахов и собеседниче Ангелов.

Молитвы преподобным Сергию и Герману, Валаамским чудотворцам

Молитва первая

из службы

О велицыи отцы наши, Христовы угодницы и теплии предстатели ко Спасу о душах наших, Сергие и Германе! Вы бо в недузех целители явистеся, по морю плавающим кормчии, и утопающим благонадежное избавление, и от всякаго смертоноснаго нашествия хранители, паче же от духов нечистых свобождение и всяких наветов, противу нас содержимых очищение и помощь. О преблаженнии отцы и чудотворцы преславнии, Сергии и Германе, молитеся ко Владыце Христу о нас грешных, яко да вашими молитвами сподобимся в День Судный деснаго предстояния и наслаждения во Царствии Божии во веки веков. Аминь.

Молитва вторая

из службы

О преподобнии, богоноснии, преблаженнии отцы наши Сергие и Германе, зрителие славы Божия в Небеснем Царствии! Не презрите нас грешных в нуждах и скорбех наших, но ускорите в помощь к вам прибегающим: приимите воздыхание и слезы, и вонмите смиренному молению нашему. Предстояще же Небесному Царю, о преблаженнии, молите благость Его, еже ущедрити место селения вашего и всякому граду и стране низпосылати обилие благ земных: державу и людие в мире и тишине сохранити, нас же всех в вере и добродетелех утвердити, избавляти же присно от вожделений греховных и от нападения видимых и невидимых врагов: обидимыя защитити, болящия уврачевати, от томительства злых духов свободити, на мори плавающия сохраняти, путешествующим спутешествовати, и всякому верному в нуждах способствовати: яко Того вси есмы творение, и Того есть царство и сила и слава во веки веков. Аминь.

Молитва третья

из акафиста

О преподобнии и богоноснии отцы наши Сергие и Германе, земнии ангели и небеснии человецы, молитвенницы теплии и ходатаи за мир непрестаннии, Валааму покрове и похвало и всем верным всегда готовое прибежище и заступление! С верою и любовию припадающе к раце честных мощей ваших, умиленно молим вас: не забудите чад своих, яже от молвы житейския в пустыни сей собрали есте: не отступите николиже от нас, но неусыпным предстательством вашим оградите нас от злых козней вражиих; утолите возстание страстей, укрепите немощь нашу в духовных бранех и подвизех, предлежащих нам, отжените всякое уныние и печаль греховную от сердец наших, и небесное утешение низпослите нам во трудех и скорбех наших. Сохраните, о преподобнии, святую обитель вашу от всякаго оскудения, от огня и меча, от смертоносныя язвы и от всякаго обстояния. Молитеся, преблаженнии, усердно молим вас, за христолюбивое воинство и за всю державу Российскую; да сохранит их Господь в мире, здравии, во всех благих преспеянии, да дарует им на враги победу и во всякой добродетели да укрепит. Помяните в молитвах ваших, угодницы Божии, и окрестную страну сию Карельскую, юже светом Христовым просветили есте; да утвердится в ней вера Православная, и да ничтоже успеют вси возстающии на малое стадо сие и от Церкве святыя отторгнути е тщащиися. Услышите, милосерднии отцы наши, и всякаго человека, с верою приходящаго к вам и благодатныя помощи вашея требующаго: будите сирым и обидимым заступницы, скорбящим утешение, болящим целители, изнемогающим укрепление, сущим в пути хранители, в мори плавающим управители и пристанище небурное. В страшный же час смертный предстаните всем нам, якоже блазии ходатаи и темных зраков демонских дерзновеннии прогонителие; да в мире и покаянии скончавше земное поприще наше, достигнем и вечных благ наслаждения, и купно с вами да воспоем и прославим всесвятое имя Отца и Сына и Святаго Духа ныне и присно и во веки веков. Аминь.

Тропарь преподобным Сергию и Герману Валаамским, глас 4

Евангелия Христова истиннии послушницы явистеся, преподобнии, мир и вся, яже в нем, яко не сущая преобидевше любве ради Христовы, и в морский остров вселистеся, и трудолюбно в нем противу козней невидимых врагов подвизастеся, постом, бдением же и всенощным стоянием плоти своя духу мудре повинули есте. Сего ради от Вседержительныя десницы достойныя венцы прияли есте. И ныне, Пресвятей Троице предстояще, молитеся, всеблаженнии отцы Сергие и Германе, сохранитися в мире отечеству нашему и спастися душам нашим.

Ин тропарь, глас 1

От мирския молвы бегающе, безмолвия и благочестия рачители, в тихое пристанище Валаама от востока приидосте и, в нем евангельски Христу добродетельми последовавше, на верх совершенства востекли есте. И ныне в торжестве премирнем богозрением наслаждающеся, преблаженнии отцы Сергие и Германе, Человеколюбца Бога молите, еже спасти всех нас, благочестно вас почитающих.

Кондак, глас 4

От мирскаго жития изшедше, отвержением мира Христу последовасте, и достигосте великаго Нева езера, и в нем, на острове Валааме, всельшеся, равноангельское житие пожили есте; отонудуже, веселящеся, прешли есте к Небесным чертогам. И ныне со Ангелы Владычню Престолу предстояще, поминайте нас, чад своих, яже собрали есте, богомудрии, да радостно от души вопием: радуйтеся, Сергие и Германе, отцы преблаженнии.

Величание

Ублажаем вас, преподобнии отцы Сергие и Германе, и чтим святую память вашу, наставницы монахов и собеседницы Ангелов.

12/25 сентября

Перенесение мощей праведного Симеона Верхотурского (1704).

Молитва праведному Симеону Верхотурскому

из службы с акафистом

О святый и праведный Симеоне, чистою душею твоею в Небесных обителех в лице святых водворяяйся, на земли же с нами неотступно пребываяй! По данней ти благодати от Господа молитися о нас, милостивно призри на нас, многогрешных, аще и недостойне, обаче с верою и упованием к тебе притекающих, и испроси нам от Бога прощение согрешений наших, в няже впадаем множицею во вся дни жития нашего. И якоже прежде овым убо, от очныя зельныя болезни ни мало зрети могущим, исцеление очес, овым же, близ смерти бывшим, от лютых недугов врачевание и иным иная многая преславная благодеяния даровал еси, сице избави и нас от недугов душевных и телесных и от всякия скорби и печали и вся благая к настоящему житию нашему и к вечному спасению благопотребная нам от Господа испроси, да тако твоим предстательством и молитвами стяжавше вся нам полезная, аще и недостойнии, благодарне восхваляюще тя, прославим Бога, дивнаго во святых Своих, Отца и Сына и Святаго Духа, и ныне и присно и во веки веков. Аминь.

Тропарь праведному Симеону Верхотурскому на перенесение мощей, глас 4

Днесь радуется славная страна Сибирь, обрет святыя твоя мощи внутрь себе. Архиерее, священницы и весь сонм людский, духовне веселящеся, вопием ти: о богомудре Симеоне! Избави нас, к тебе прибегающих, от всех бед, просяще податися всем по коегождо прошению и избавитися стране сей и граду от огненнаго запаления и поганскаго нашествия и междоусобныя брани и от всякаго зла. Темже и мы все чтем ныне честных и многоцелебных мощей твоих пренесение, новый целебниче, вси мы вопием: слава Дающему тобою всем исцеление!

Ин тропарь на прославление, глас тойже

Мирскаго мятежа бегая, все желание обратил еси к Богу, да в видения восход обрящеши горе, и тако не уклонився в лукавствия сердца, но очистив душу и тело, приял еси благодать точити цельбы верным и неверным, притекающим к тебе, праведный Симеоне. Темже по данному ти дару испроси у Христа Бога исцеление нам, болящим душевными страстьми и моли спасти души наша.

Кондак на перенесение мощей, глас 4

Наста днесь всечестная память новаго целебника, праведнаго Симеона, созывает же люди в пречестный храм святаго Божия архиерея Николая, идеже, радостно сошедшеся благочестивых множества весело празднуют пренесения честных и многоцелебных мощей твоих праздник. Ты бо явился еси граду нашему и всей Сибири врачевство безмездное, подавая исцеление с верою приходящим к тебе, Симеоне всеблаженне. Но, яко имеяй дерзновение ко Владыце Христу, Того моли спасти град и люди, молящияся тебе, паче же ходатай буди ко Господу во дни нашествия печали рабом твоим, да зовем ти: радуйся, Сибирстей стране похвало и утверждение граду нашему.

Ин кондак на прославление, глас 2

Мира суетнаго отверглся еси, да блага вечныя жизни наследиши, возлюбив незлобие и чистоту души и тела. Снискал еси, еже возлюбил, свидетельствуют бо о сем гроб и нетление мощей твоих и благодать чудотворения наипаче. Точиши бо цельбы всем притекающим к тебе и непросвещенным, Симеоне блаженне, чудотворче предивный.

Величание

Величаем тя, святый праведный Симеоне, и чтим святую память твою, ты бо молиши за нас Христа Бога нашего.

Праведному Симеону Верхотурскому молятся об исцелении болей ног (он сам, пеший, совершил свой путь из России в Сибирь, чувствуя изнеможение в своих ногах), об исцелении болезней глаз.

13/26 сентября

Память обновления (освящения) храма Воскресения Христова в Иерусалиме (Воскресение словущее) (335).

Предпразднество Воздвижения Честного и Животворящего Креста Господня.

Тропарь обновлению, глас 4

Якоже вышния тверди благолепие, и нижнюю споказал еси красоту святаго селения славы Твоея, Господи, утверди сие во век века и приими наша в нем непрестанно приносимая Тебе моления, Богородицею, всех Животе и Воскресение.

Кондак, глас тойже

Небо многосветлое Церковь показася, вся просвещающая верныя, в нейже стояще, зовем: сей дом утверди, Господи.

Ин кондак, глас 2

Обновление духа в сердцах и просвещение внутренним даруй верою совершающим священная обновления храма дому Твоего, емуже благоволил еси создатися в Твое Божественное имя, Едине во святых Прославляемый.

Тропарь предпразднеству, глас 4

Животворящий Крест Твоея благости, егоже даровал еси нам недостойным, Господи, Тебе приносим в молитву: спаси град Твой молящийся, Богородицею, Едине Человеколюбче.