Помощь небесных покровителей. Полный сборник молитв на каждый день года (осень)

чтомая в Успенской церкви града Углича Ярославской епархии

О всесвятый и великий угодниче Христов, Иоанне Златослове, Началопастыря и Архиереа Великаго, небеса прошедшаго, Господа нашего Иисуса Христа учениче, риторе благоискусный и премудрый, обидимым великий заступниче и предстателю, больных немздоприемный целебниче, грешников ко спасению и покаянию истинный наставниче, нищих питателю, вдовам и сирым помощниче и о всех теплый молитвенниче! Молим тя ныне, грешнии и недостойнии: моли о нас Щедролюбиваго Бога, да подаст нам благодать Святаго Духа ко укреплению немощей наших, яко зело преогорчихом безмерную Его благость безчисленными нашими грехи, завистию, гордостию, гневом, братоненавидением и иными грехи, ихже и исчести несть возможно, и уже не смеем на небо возвести очеса наша и призвати имя святое Его. Темже к тебе припадаем, молящеся со слезами: тебе бо дадеся благодать от Бога молитися за ны. Подаждь убо ми, паче всех грешнейшему, руку твоея помощи, понеже изнеможе во мне крепость моя, и живот мой даже до ада приближися, и весь сокрушихся, яко скудель, о камень отчаяния. Ускори, о архиерею великий, на помощь мою, и расторгни узы печали моея святыми твоими молитвами, и подаждь ми лечьбу покаяния; разжени облак темный страстей моих, посети мя милостию твоею, и неплодную душу мою благоплодну сотвори. Ты веси, о архиерею Божий, святе Иоанне Златоусте, горесть сердца моего; темже по благодати, тебе данней от Бога, потщися преложити ю на сладость всесильным твоим к Богу ходатайством: можеши бо, аще восхощеши, помощи мне окаянному, грешному, хульнику, распинателем общнику; несть бо грех, побеждаяй человеколюбие Божие, яко хотением не хощет смерти грешника, но милостивно ожидает его покаяния и обращения. Буди убо подобник Владыце Христу, иже и блудницы слез не презре: сице и ты, о трубо благогласная, и моего воздыхания не презри, но возгреми ко мне гласом радования, и исполни недостаточество мое и скудость от неоскудных твоих сокровищ; буди ми пастырь добрый, далече отгоняя от мене мысленная волки жезлом святых твоих молитв; направи стопы моя тещи непретковенно путем заповедей Господних: да достигну и аз пажити райския, идеже есть источник жизни и непрестанное веселие, и радость, и сладкий глас ангельскаго пения: еже да сподобимся вси мы получити, благодатию и человеколюбием Господа и Бога и Спаса нашего Иисуса Христа, Емуже да будет от нас всякая слава, честь и поклонение, со Отцем и Святым Духом, ныне и присно и во веки веков. Аминь.

Тропарь святителю Иоанну Златоусту, глас 8

Уст твоих, якоже светлость огня возсиявши, благодать вселенную просвети: не сребролюбия мирови сокровища сниска, высоту нам смиренномудрия показа, но, твоими словесы наказуя, отче Иоанне Златоусте, моли Слова Христа Бога спастися душам нашим.

Кондак, глас 6

От Небес приял еси Божественную благодать и твоими устнами вся учиши покланятися в Троице единому Богу, Иоанне Златоусте, всеблаженне преподобне, достойно хвалим тя: еси бо наставник, яко Божественная являя.

Величание

Величаем тя, святителю отче Иоанне, и чтим святую память твою, ты бо молиши за нас Христа Бога нашего.

Святителю Иоанну Златоусту молятся о просвещении разума к учению духовной грамоте и о помощи в отчаянии.

Молитва пред иконою Пресвятой Богородицы, именуемой «Благодатная»,

чтомая в церкви села Бельчина Волынской епархии

Царице моя преблагая, надеждо моя Богородице, прибежище сирых и странных предстательнице, скорбящих радосте, обидимых покровительнице! Зриши мою беду, зриши мою скорбь, помози ми яко немощну, направи мя яко странна. Обиду мою веси, разреши ту, якоже волиши: яко не имам иныя помощи разве Тебе, ни иныя предстательницы, ни благия утешительницы, токмо Тебе, о Богомати, яко да сохраниши мя и покрыеши во веки веков. Аминь.

Величание

Величаем Тя, Пресвятая Дево, Богоизбранная Отроковице, и чтим образ Твой святый, имже точиши исцеления всем, с верою притекающим.

15/28 сентября

Попразднство Воздвижения Креста.

Великомученика Никиты (ок. 372).

Обретение мощей первомученика архидиакона Стефана (415).

Молитвы великомученику Никите

Молитва первая,

чтомая в Каширском Никитском монастыре Тульской епархии

К тебе, яко скорому и избранному спасения нашего ходатаю, богоизбранному воеводе, оружием креста враги победившему, великомучениче Никито, вседушно прибегаем: не отвратися от нашея нищеты, молению нашему внемли, и от бед нас и обитель сию сохрани. Простри руку твою, скорую помощь подающую, управи ум наш от пагубоносных разсеяний, и сердца наша оскверненная очисти, освяти и горе имети утверди. От враг видимых и невидимых нас сохрани, да над страстьми победители явимся, творяще святыню во страсе Господни, и всякое уныние поправше, радоватися о Господе начнем: и тако твоими ходатайствы, во смирении и простоте сердца, сподобимся до последняго издыхания боголепно Отца и Сына и Святаго Духа воспевати и твоя боговенчанныя подвиги и чудеса прославляти во веки веков. Аминь.

Молитва вторая

из акафиста

О великий страстотерпче Христов и чудотворче, великомучениче Никито! Припадающе к святому и чудотворному образу твоему, подвиги же и чудеса твоя и многое сострадание твое к людем прославляюще, молим тя прилежно: яви нам, смиренным и грешным, святое и многомощное твое заступление: се бо, грех ради наших, не имамы свободы чад Божиих, еже о потребах наших Господа и Владыку нашего дерзновенно просити: но тебе, молитвенника к Нему благоприятнаго, предлагаем и о твоем предстательстве взываем: испроси нам у Господа благопотребныя дары душам и телесем нашим: веру правую, спасения надежду несумненную, любовь же ко всем нелицемерную, во искушениих мужество, в злостраданиих терпение, в молитвах постоянство, душ и телес здравие, земли плодоносие, воздуха благорастворение, житейских потреб довольство, мирное и благочестное на земли житие, христианскую жития кончину и добрый ответ на страшнем судище Христовем. Еще, о страстотерпче Христов, у Царя Небеснаго испроси всем православным христианом мир, здравие и спасение, на враги победу и одоление, в сей же богохранимей стране благоустроение, тишину и благоденствие. Христолюбивому воинству буди соратай и помощник на враги, и всем людем православным яви твое святое заступление: болящия исцели, скорбящия утеши, бедствующим помози: ей, угодниче Божий и мучениче долготерпеливый! Не забуди святую обитель твою и вся живущия в ней и подвизающияся инокини же и мирския, но поспеши им в смирении и терпении носити иго Христово и от всяких бед и искушений милостивне избави. Всех убо нас приведи в тихое пристанище спасения и наследники сподоби быти пресветлаго Царствия Христова святыми твоими молитвами: да славим и поем великия щедроты Отца и Сына и Святаго Духа, в Троице славимаго и покланяемаго Бога и твое святое заступление во веки веков. Аминь.

Молитва третья,

чтомая в Московской Никитской, за Яузою, церкви

О великое светило, осиявающее всего мира концы, страстотерпче Христов Никито! Днесь умиленно предстояще честней твоей иконе и припадающе и лобызающе сию, усердно молим тя: испроси нам у Христа Бога нашего оставление грехов, исправление жития, и вся благая ко временней и вечней жизни потребная. О, пречестный и преславный страстотерпче Христов! Не презри моления нашего и не остави нас, к тебе прибегающих, но милостивно воззри на ны и на земную юдоль нашу; помяни нас, странствующих и пришельствующих, и дарованною тебе от Бога силою руководи нас к Небесному Отечеству; укрепи нашу немощь, огради нас от грехопадений, возгрей в нас святую любовь ко Господу, и ревность о спасении нашем подаждь нам; насади в сердцах наших страх божественный, и направи стопы наша к деланию заповедей Христовых. Испроси же предстательством твоим у Всемилостиваго Бога нашего мир Церкви Его, людем в вере единомудрие, суемудрия же и расколов истребление и в делех благих утверждение, больным исцеление, печальным утешение, обиженным заступление, бедствующим помощь. Наипаче же молитвою твоею соделай всем нам, еже жити целомудренно и праведно и благочестиво в нынешнем веце, присно же час смертный и страшное второе пришествие Господа и Бога нашего Иисуса Христа памятовати, да благодатию и человеколюбием Его соблюдаеми и спасаеми, мытарств горьких от бесов, воздушных князей, и вечныя муки избавимся, и в Небеснем Царствии поклонитися престолу Божию да сподобимся, благодарно и всерадостно прославляюще Пресвятую и Пребожественную Троицу, Отца и Сына и Духа Святаго, во веки веков. Аминь.

Молитва четвертая,

чтомая в некиих храмах Тульской епархии

О великомучениче Христов Никито! Храбр был еси во бранех, и врагом прогонитель, и обидимым заступник, всем же православным христианом предстатель. Помилуй мя грешнаго и недостойнаго, и заступи в бедах и в скорбех и в печалех и во всякой злой напасти, и от всякаго злаго и обидящаго человека мя огради: тебе бо дана бысть таковая благодать от Бога, еже молитися за ны грешныя, в бедах и напастех зле страждущия. Избави убо нас от обидящих и ненавидящих нас, буди нам всегда поборник крепок на вся видимыя и невидимыя враги наша: во брани воинство укрепи, яко да твоим крепким поборством посрамятся вси творящии рабом твоим злая. О великий поборниче наш Никито! Не забуди нас, всегда молящихся тебе и просящих у тебе помощи и неоскудныя милости, и сподоби ны, грешныя и недостойныя, неизреченная благая от Бога получити, яже уготова любящим Его. Яко Тому подобает всякая слава, честь и поклонение, Отцу и Сыну и Святому Духу, ныне и присно и во веки веков. Аминь.

Молитва пятая,

чтомая в Афанасиевской Никитской церкви града Вязьмы Смоленской епархии

О великий Христов страстотерпче Никито! Услыши молитву нас грешных, молящихся тебе на всякий день и всякий час: избави нас, святый страстотерпче, от всякия печали и находящия напасти, от внезапныя смерти и от всякаго зла; в час же разлучения души от тела отжени, страстотерпче, всякую лукавую мысль и лукавыя бесы, яко да приимет души наша с миром в место светло Христос Господь Бог наш, яко от Него очищение грехов, и Той есть спасение душ наших, Емуже подобает всякая слава, честь и поклонение, со Отцем и Святым Духом, ныне и присно и во веки веков. Аминь.

Тропарь великомученику Никите, глас 4

Мученик Твой, Господи, Никита во страдании своем венец прият нетленный от Тебе, Бога нашего: имеяй бо крепость Твою, мучителей низложи, сокруши и демонов немощныя дерзости. Того молитвами спаси души наша.

Ин тропарь, глас тойже

Крест Христов, яко некое оружие, усердно восприим, и к борению врагов притекл еси, и, за Христа пострадав, последи огнем священную твою душу Господу предал еси, отонудуже и даров исцеления от Него сподобился еси прияти, великомучениче Никито. Моли Христа Бога спастися душам нашим.

Кондак, глас 2

Прелести посек державу стоянием твоим и победы приим венец во страдальчествех твоих, со Ангелы, славнее, радуешися, Никито тезоимените, с ними Христа Бога моля непрестанно о всех нас.

Величание

Величаем тя, страстотерпче святый Никито, и чтим честная страдания твоя, яже за Христа претерпел еси.

Великомученику Никите молятся об исцелении детей от падучей болезни, известной под названием «родимец», о сохранении и благосостоянии водоплавающей птицы.

Молитва апостолу, первомученику и архидиакону Стефану,

чтомая в Стефановской церкви града Ростова Ярославской епархии

Первый во диаконех, первый и в мученицех показался еси, святый Стефане, апостоле, исполнь бо веры и силы во учении и в знамениих велик явился еси, и никтоже возможе противустати премудрости и духу, имиже глаголал еси, лице же твое на сонмищи видено бысть, яко лице ангела. Темже, исполнен Святаго Духа быв, видел еси отверстое небо и славу Божию и Сына человеча, Господа нашего Иисуса Христа, одесную стояща Бога Отца. Таже и от жестоковыйных и убийц иудеев камением пред лицем Преблагословенныя и молящияся о тебе Девы, Матере Его, побиваемь, преклонь колена, возопил еси гласом велиим: Господи, не постави им греха сего! И тако дух твой Господу Иисусу радостно предал еси. Сего ради молитвенника и предстателя тя стяжахом, колена души и сердца нашего преклоньше, тя молим: воздежи руце твои ко Господу, и сподвижи всему роду человеческому Предстательницу и Ходатаицу к Сыну Своему, Пресвятую Матерь Деву, и о нас, присно прогневляющих грехом и леностию, моли Благаго Спаса нашего, да подаст нам благодать во благовременную помощь к покаянию и твоим предстательством и заступлением Пресвятыя Матере Своея в день он, страшный и праведный, да не поставит пред нами грехи наша, но по щедротам Своим, тобою умолен быв, да речет души нашей: спасение ваше есмь Аз во веки веков. Аминь.

Тропарь апостолу, первомученику и архидиакону Стефану, глас 4

Подвигом добрым подвизался еси, первомучениче Христов, и апостоле, и архидиаконе Стефане, и мучителей обличил еси нечестие: камением бо побиен от рук беззаконных, венец от яже свыше десницы приял еси и к Богу взывал еси, вопия: Господи, не постави им греха сего.

Ин тропарь, глас 3

Апостолом совсельник и страстотерпцем первострадалец, Христов служитель, прехвальне Стефане, первее бо совершив мучения течение, безчисленныя роды человек равно Подвигоположнику Христу приведе. Темже яко апостола и страдальца верховнаго чтуще тя, молим: моли Христа Бога даровати нам велию милость.